Оңтүстік астанадағы №2 Балалар қалалық клиникалық ауруханасында ресейлік мамандардың қатысуымен үш күндік шеберлік класы өтті. Шара барысында белгілі ортопед-травматолог Георгий Чибиров пен Орхан Гатамов №2 БҚКА дәрігерлерімен бірлесіп, ауыр нейроортопедиялық кемістіктерге шалдыққан қазақстандық 4 балаға бірегей ота жасады.
Ортопедия саласындағы жетекші мамандар елімізге «Милосердие» қоғамдық қоры мен Samruk-Kazyna Trust әлеуметтік жобаларды дамыту қорының шақыртуымен ат басын тіреді.
Шеберлік класы барысында балаларға күрделі неврологиялық дерттер, соның ішінде церебралды сал ауруы салдарынан пайда болған аяқ-қол кемістігін жойып, қимыл-қозғалыс аппаратының қызметін қалпына келтіруге бағытталған көпбейінді 4 операция жасалды.
Жоғары технологиялық медициналық көмек МӘМС қаражаты есебінен жасалды.
«Біздің клиникада бір мезетте көп деңгейлі ота жасау тәжірибесі белсенді түрде қолданылады. Көп деңгейлі операция барысында анестезия да бір рет қолданылады, біздің мамандар бірнеше манипуляцияны кезең-кезеңмен жүзеге асыра алады. Ал, мұндай оталарды ортопедия саласында жинақтаған тәжірибесі мол ресейлік әріптестермен бірлесіп жасау пациенттерге көрсетілген хирургиялық көмектің нәтижесін еселендіре түсетіні хақ. Оның үстіне, үнемі өзара тәжірибе алмасудың сырқаттарды емдеуде атқарар рөлі де зор», – деп атап өтті №2 БҚКА директоры Марат Рабандияров.
Шеберлік класы барысында науқастар консультация алды, дәрігерлер балалардың церебралды сал ауруына шалдыққан сырқаттарға оперативтік ем жасаудың қосымша техникаларын меңгерді. Барлығы түрлі медицина ұйымдарында еңбек ететін 16 маман біліктілігін арттырып, тәжірибе алмасуға мүмкіндік алды.
ЖАЛҒАСЫ
*Алматыда аяқ-қол кемістігі зардабын тартып жүрген балаларға көп деңгейлі операциялар жасалды*